Islamic Hadees in Roman Urdu | Hadith in Roman Urdu:-

Hadith in Roman Urdu:-

🌺Hazrat Abu Saeed Khudri razi Allah anho bayan karte hain ke 'Rasoolullah ﷺ ne farmaya: "Apne marne walon ko kalma [La Ilaha Illallah] ki talqeen karo."'

wazahat:-

Jab koi shakhs mout ke qareeb ho to use kalma "La Ilaha Illallah" padhane ka hukum diya gaya hai taake wo ise apni zuban par jari kar le aur jannat ka haqdaar ban jaye. Masnoon tareeqa ye hai ke marne wale se kaha jaye ke wo kalma padh le. Dosri surat jo aam tor par raaij hai wo ye hai ke paas baithe log khud kalma padhte hain taake mareez ko yaad dilaya jaye.

Hadees me bayan karda fazilat un logon ke liye hai jo haqeeqi mano me kalma ke taqaze poore karte hain aur shirk o bidat se door rehte hain. Agar koi shakhs mehaz rasam ke tor par kalma padhe aur amali tor par shirk o bidat me mubtela ho to is surat me kalma padhna mout ke waqt mufeed nahi hoga. Taham agar koi shakhs azm ke sath kalma padhe ke use mauqa mile to wo is ke taqaze poore karega, to ye mufeed aur baais-e-basharat hoga.

📚 _*Sunan Abu Dawud: jild 3, Kitab Al-Jana'iz 21, hadith no. 3117*_
*Grade sahih*