Islamic Hadees in Roman Urdu | Hadith in Roman Urdu | Daily Hadees in Roman Urdu
Hadith in Roman Urdu:-
Kuch logo ne arz kiya: "Ya Rasoolullah! Bohot se log humare yahan gosht late hain. Hume ye maloom nahi ke Allah ka naam unhone zabah ke waqt liya tha ya nahi?" Is par Rasoolullah ﷺ ne farmaya: "Tum Bismillah padh ke ise kha liya karo."
wazahat: Is hadees ka matlab ye hai ke jab koi musalman gosht laye to us ke bare me nek guman rakha jaye aur ye samjha jaye ke us ne Allah ka naam le kar zabah kiya hai, jab tak ke is ke baraks koi wazeh daleel na ho. Yani agar koi aisi baat samne naa aaye jis se maloom ho ke musalman ne zabah ke waqt Bismillah nahi padhi ya Allah ke siwa kisi aur ka naam liya, to us ka laya hua ya pakaya hua gosht halal samjha jayega. Is se musalman ke bare me acha guman rakhne ki targhib milti hai.
Is hadees ka hargiz ye matlab nahi ke mushrikon ka laya hua ya pakaya hua gosht halal samjha jaye. Fuqaha ne wazeh kiya hai ke agar koi mushrik qasai bhi ye kahe ke janwar ko musalman ne kata hai to us ka qoul maqbool nahi hoga. Is liye mushrik ya kaafir (ghair muslim) qasai se gosht lene me khas tor par ehtiyat ki zarurat hai taake halal aur haram ki hudood ki pabandi ki ja sake.
Hafiz Ibn Hajar رحمہ اللہ ne likha hai ke ye hadees musalmanon ke mutaliq husn-e-zan rakhne ki daleel hai, neez ye ke musalmano ke umoor kamaal par mahmool hain. Khusoosan is zamane me jab har musalman deen-e-Islam se bakhoobi waqif ho.
[📗Fath al-Bari: 4/375]
0 Comments